P​ri la 11-a Mezorienta Kunveno en Marakeŝo : Maroko estu nia venonta lando de Esperanto

Kiu ne vidis Marakeŝon, tiu povas nur bedaŭri. Tiu ne spertis la metion de la sorĉistoj de serpentoj, kiuj per siaj flutoj mirinde kvietigas siajn serpentojn. Certe la serpentoj ankaŭ kunlaboras kiel bonkondutaj laboristoj, kiuj lernis kaj aplikas la rutinon. Tio okazas en la centra placo, Ĝama al-Fna, kies nomo estas same mistera, kiel la agadoj tie okazantaj. Ne malproksime de tiu placo praktikis sian metion alia sorĉistino, Annie Grente, kiu sorĉis neesperantistajn gejunulojn kaj enmetis en iliajn kapojn la faktojn pri Esperanto. Ŝia metio estas pli malfacila, ĉar la junaj lernantoj estas tre pli vigle demandaj ol la rutinaj serpentoj. Tamen ŝi sukcesis.

Fakte partoprenis la kunvenon amaseto de junaj marokaj lernintoj aŭ lernantoj de Esperanto. Aldone al ili estis trideko da eŭropanoj kaj unu senegalano. Temis entute pri 17 landoj.

La prelegoj estis entute variaj. Kelkaj estis pure movadaj, kiel tiuj de Renato Corsetti pri “La historio de la Mezorientaj Kunvenoj” aŭ de Stefan MacGill pri “La AMO-seminarioj”. Kelkaj prelegoj estis kunligitaj kun Maroko kiel tiu de Annie Grente (kiu fakte estis filmo pri la vivo de la maroka verkisto “Leo, la afrikano”, verkinta en Italujo dum la renesanco) aŭ tiu de José Salguero pri “Juan Goytisolo, transkultureco transĝibraltara”, aŭ tiu de Tatjana Loskutova pri “Estinta karavano esperantista al la UK en Seulo kaj pri estonta al la kongreso en Lahti en 2019″.

Sed la ĉefaj prelegoj okazis en la dimanĉa mateno kaj temis pri specife marokaj temoj. Unu estis de la loka profesoro Abderrazzak Benchaabane, kiu parolis pri “La origino de Marakeŝo kaj pri ĝiaj multaj ĝardenoj, savenda havaĵo de la homaro“. La dua prelego estis de Hassan Aslafy, loka fondinto de la Instituto de Andaluzioj en Maroko. Lia ideo estas esperantisma ĝis nun sen Esperanto. Temas pri “Klopodo konigi kaj revivigi la kunlaboron inter civilizoj, kiu ekzistis en la mita epoko de Al-Andalus (regiono de Hispanujo kun multaj ligoj en Maroko kaj Norda Afriko)”. Sekve de la prelego oni komencis kunlabori por formi esperantisman projekton en la pli granda projekto pri kunlaboro inter civilizoj.

Prelegis krome Mireille Grosjean pri “Limoj” kaj Maria Butan pri “La atendo kiel formo de ekzisto“. Sed ne mankis fakaj prelegoj, kiel tiuj de Eduard Kusters, “Kiajn medicinistojn bezonas la nuna jarcento aŭ la ĵuro de Hipokrato en nia tempo” kaj de Frank Lappe, “Kurseto pri medicina unua helpo por nefakuloj“.

La ekzistantaj tekstoj de la prelegoj estas troveblaj en la paĝaro:
https://uea.org/vikio/Prelegoj_en_Marakesho

Riĉigis la kunvenon spektaklo de Saŝa Pilipoviĉ kaj Georgo Handzlik, “La kredito“, kiu estis prezentita ankaŭ dum la UK en Nitra.

La ĝenerala impreso estas, ke Maroko estas preta por Esperanto kaj ke la ideo pri Esperanto tute ne renkontas kontraŭstarojn inter la junaj marokanoj. Espereble la ekzistantaj esperantistoj kaj la novaj lernantoj surprizos nin post unu-du jaroj.

Renato Corsetti
Kunordiganto de MONA

Marakeŝo…………………………………………………………………………………………………………
Marakeso   foto 01

prelegas Mirejo Grosjean………………….   prelegas José Salguero……………………
foto 02  foto 03
“La Kredito” spektaklo de Saŝa Pilipoviĉ kaj Georgo Handzlik…………………..
foto 04  foto 05
prelegas Hassan Aslafy………………..  prelegas Maria Butan…………………………..
foto 07  foto 08
prelegas Abderrazzak Benchaabane​..  prelegas Eduard Kusters……………….
foto 09  foto 10
junaj marokanoj………………………………  la kunveno………………………………………
SAMSUNG CAMERA PICTURES  SAMSUNG CAMERA PICTURES

 

Tiu ĉi enskribo estis afiŝita en KOMISIONO, KUNVENO. Legosigni la fiksligilon.

Respondi

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Ŝanĝi )

Google photo

You are commenting using your Google account. Log Out /  Ŝanĝi )

Twitter picture

You are commenting using your Twitter account. Log Out /  Ŝanĝi )

Facebook photo

You are commenting using your Facebook account. Log Out /  Ŝanĝi )

Connecting to %s